Եվրոպայի առաջնությունից 1 արծաթե մեդալ

Դորտմունդում ավարտվեց ազատ ոճի ըմբշամարտի Եվրոպայի առաջնությունը: Ասպարեզ դուրս եկան Հայաստանի ևս 4 ներկայացուցիչներ:

55 կգ քաշային Միհրան Ջաբուրյանը կիսաեզրափակիչ փուլ անցնելու պայքարում 0:2, 0:1 հաշվով զիջեց Բելառուսը ներկայացնող Վլադիսլավ Անդրեևին: Վերջինս պարտություն կրեց կիսաեզրափակիչում, ուստի Ջաբուրյանը զրկվեց  բրոնզե մեդալի համար պայքարից:

66 կգ քաշայինների պայքարում Հայաստանը ներկայացրեց Եվրոպայի մրցանակակիր Ժիրայր Հովհաննիսյանը, ով պարտվեց Ադամ Բատիրովին (Ռուսաստան) և չհասավ եզրափակիչ:

84 կգ քաշային Հապետնակ Կուրղինյանը կիսաեզրափակիչ անցնելու գոտեմարտում զիջեց շվեյցարացի Մարկոս Ռիսեն:

120 կգ քաշայինների պայքարում սպասելիքները մեծ էին Ռուսլան Բասիևից, սակայն Հայաստանը ներկայացնող գերծանր քաշային ըմբիշը ևս չանցավ կիսաեզրափակիչ` պարտվելով ադրբեջանցի Ջամալադին Մագոմեդովին:

Այսպիսով, Հայաստանի ազատ ոճի հավաքականը մեծ արծաթե մեդալով ավարտեց ելույթները Եվրոպայի առաջնությունում: Երեկ 74 կգ-ի պայքարում արծաթե մեդալ նվաճեց դաղստանցի Մուսա Մուրթազալիևը: