Պետական ապարատում էլ ունենք կրծողներ

«Չեմ կարծում, որ հանրապետության վարչապետն անհեթեթ բաներ ասի, ուղղակի կարող է տեղյակ չլինել»,- լրագրողների խնդրանքով անդրադառնալով վարչապետ Տիգրան Սարգսյանի` վերջին շրջանում գյուղեր այցելություններին ու այնտեղ հնչեցրած մտքերին, ասաց «Հայաստանի ագրարագյուղացիական միավորում» ՀԿ-ի նախագահ Հրաչ Բերբերյանը:

«Եթե ամեն մի նախարարի տեղակալ, վարչության պետ, մարզպետ իրենց տեղում լինեն եւ պատասխան տան իրենց արարքների համար, մենք կունենանք նորմալ գյուղատնտեսություն»,- ասաց Բերբերյանը` շեշտելով, որ այն միջոցները, որ պետությունը հատկացնում է գյուղատնտեսությանը, արդյունավետ չեն ծախսվում:

«Ցավոք, մենք ունենք չինովնիկներ, որոնք եկել են միայն ու միայն պետական աթոռներ գրավելու եւ իրենց գրպանի մասին մտածելու: Պետք է այդ չինովնիկներին արանքից հանենք, բայց քանի դեռ ոչ միայն դաշտերում, այլեւ պետական ապարատում ունենք կրծողներ, գյուղատնտեսության վիճակը չի լավանա»,- նշեց բանախոսը:

Նա նաեւ նշեց, որ հանրապետության նախագահի հանձնարարականները շատ չինովնիկներ փորձելու են ձախողել, որովհետեւ, հակառակ պարագայում, նրանց գրպանները ոչինչ չի ընկնի: