ԱՄՆ-ը կօգնի տապալել Քադաֆիին

Վաշինգտոնը պատրաստ է ցանկացած օգնություն ցույց տալ պաշտոնաթողությունից հրաժարվող լիբիացի առաջնորդ Մուամար Քադաֆիի հակառակորդներին: Ինչպես տեղեկացնում է Associated Press գործակալությունը, երեկ նման հայտարարություն է արել ԱՄՆ պետքարտուղար Հիլարի Քլինթոնը:

Նա նաեւ դիմել է Աֆրիկայի մյուս երկրների կառավարություններին՝ հորդորելով ռազմական օգնություն ցույց չտալ Քադաֆիին եւ վարձկաններ չուղարկել Լիբիա: Քլինթոնը չի ճշտել, թե ԱՄՆ-ը կոնկրետ ինչով է պատրաստ օգնել, սակայն ռազմական օգնության մասին առայժմ խոսք չկա:

Երեկ լիբիական ընդդիմությունը խոշոր հաջողության է հասել Քադաֆիի կողմնակիցների նկատմամբ: Թեեւ Տրիպոլին դեռեւս իշխանության հսկողության ներքո է, ընդդիմադիրներն ամրապնդել են իրենց դիրքերը մայրաքաղաքի շրջակա տարածքներում: Նրանք գրավել են Տրիպոլիից ընդամենը 40 կմ հեռավորության վրա գտնվող Էզ Զավիյա խոշոր քաղաքը:

Տարբեր տվյալներով` փետրվարի 15-ից սկսված ընդվզումների հետեւանքով զոհվել է 1000-2000 մարդ, ավելի քան 5 հազարը վիրավոր են: