Հաագայի դատարանը Քադաֆիին ձերբակալելու հրաման է տալու

Հաագայի միջազգային քրեական դատարանն այս շաբաթ Լիբիայի կառավարության 5 անդամների, այդ թվում` Ջամահիրիայի առաջնորդ Մուամար Քադաֆիի եւ նրա ավագ որդու` Սեիֆ ալ Իսլամի ձերբակալության հրամանագիր է տալու:

Այսօր նման տեղեկատվություն է տարածել «Ալ Արաբիա» հեռուստաալիքը, որի ձեռքն է ընկել գլխավոր դատախազ Լուիս Մորենո-Օկամպոյի զեկույցը:

Ըստ լրատվամիջոցի` ձերբակալման ենթակա են նաեւ Լիբիայի նախկին արտգործնախարար Մուսա Կուսան, որը փախել էր Մեծ Բրիտանիա, եւ արտաքին անվտանգության ծառայության ղեկավար Աբու Զեյդ Օմար Դուրդահը, որը ներկայումս թաքնվում է Թունիսում:

Հաագային դատարանն ապացույցներ ունի, որ Լիբիայի կառավարությունը, մինչ երկրում քաղաքացիական պատերազմի բռնկումը, ծրագրել է քաղաքացիների սպանությունների միջոցով ճնշել դժգոհությունները:

Սպասվում է, որ Մորենո-Օկամպոն վաղը` մայիսի 5-ին, զեկույց կներկայացնի ՄԱԿ-ի Անվտանգության խորհրդին: