Վթարվել է Արզական-Երեւան ջրատարը

Վերին Պտղնի գյուղին հարակից տարածքում անհայտ անձինք զգալի քանակությամբ ժայռաբեկորներ են լցել ձորը, ինչի հետեւանքով վթարվել է Արզական-Երեւան մայր ջրատարը. տեղի է ունեցել վայրկյանում 85-90 լիտր ջրի արտահոսք:

«Երեւան Ջուր» ընկերությունը տեղեկացնում է, որ ջրատարի վերականգնման համար անհրաժեշտ է կառուցել 200 գծամետր երկարությամբ նոր խողովակաշար: Հաշվի առնելով բարդ տեղանքը` կպահանջվի մոտ 2 ամիս:

Ընկերությունը հայցում է մայրաքաղաքի Արաբկիր վարչական շրջանի եւ հարակից տարածքների սպառողների ներողամտությունը վթարի հետեւանքով պատճառվող անհանգստության համար եւ հավաստիացնում է, որ կարվի առավելագույնը մինչեւ խնդրի վերջնական կարգավորումը հնարավորինս բարվոք ջրամատակարարում ապահովելու համար: