"Շախտյորն" ամենազարգացող ակումբն է

Ֆուտբոլի պատմության և վիճակագրության միջազգային ֆեդերացիան (IFFHS) 21-րդ դարի ամենազարգացող թիմը ճանաչել է «Շախտյորին»: Նշվում է, որ «հանքափորները» դեռ տասը տարի առաջ նույնիսկ մոլորակի 1000 ուժեղագույն ակումբների ցուցակում չկար, իսկ այժմ IFFHS-ի վարկանշում 24-րդ տեղն է զբաղեցնում:

«Շախտյորը» գերազանցել է իսպանական երկու ակումբների` «Վիլյառեալին» և «Սևիլիային»: Առաջինը վերջին տասնամյակում հավաքել է «հանքափորներից» 65.5 միավոր պակաս վարկանշային միավոր, իսկ երկրորդը` 192-րդ տեղից բարձրացել է 21-րդ հորիզոնական: Կիևի «Դինամոն» դասակարգման աղյուսակում 31-րդ տեղն է զբաղեցնում:

21-րդ դարի առաջին տասնամյակի լավագույն ակումբ ճանաչվել է իսպանական «Բարսելոնան», որը գերազանցել է «Մանչեսթեր Յունայթեդին» և «Լիվերպուլին»: «Բարսելոնայի» և «Շախտյորի» պարգևատրման արարողությունը կկայանա հատուկ World Football Gala-2011 մրցանակաբաշխության ժամանակ: