Եվրո 2012-ը կասկածի տակ է

ՈՒԵՖԱ-ի ներկայացուցիչները սպառնացել են Ուկրաինայի ֆուտբոլի ֆեդերացիայի նկատմամբ պատժամիջոցներ կիրառել: Ֆուտբոլային պաշտոնյաները դեմ են, որ երկրի քաղաքական գործիչները միջամտեն երկրի սպորտային գործերին:

Ուկրաինացիներին մինչև փետրվարի 4-ը ժամանակ է տրվել, որպեսզի իրավիճակը կարգավորեն: Եթե պահանջը չբավարարվի, Ուկրաինան կարող է զրկվել ՈՒԵՖԱ-ի հովանավորությամբ անցկացվող մրցաշարերի մասնակցությունից, ներառյալ նաև Եվրո-2012-ից, որը կանցկացվի Ուկրաինայում և Լեհաստանում:

Այսպիսով, ՈՒԵՖԱ-ն կարող է առհասարակ զրկել Ուկրաինային աշխարհամասային առաջնության անցկացումից այն բացատրությամբ, թե իմաստ չունի մրցաշար կազմակերպել մի երկրում, որի հավաքականը չի մասնակցելու դրան:

Հիշեցնենք, որ այս պատժամիջոցի պատճառն այն է, որ իշխանությունները փորձել են հեռացնել Ուկրաինայի ֆուտբոլի ֆեդերացիայի նախագահ Գրիգորի Սուրկիսին: Ավելի վաղ նման հայտարարություն արել է նաև ՖԻՖԱ-ն: