ԼՂՀ Վերահսկիչ պալատն ամփոփել է տարին

Ամենաօրինապաշտ պետական կառույցներն են ԼՂՀ դատախազությունը, արդարադատության նախարարությունը, Ազգային վիճակագրական ծառայությունը եւ մարդու իրավունքների պաշտպանի աշխատակազմը, այսօր հրավիրած մամուլի ասուլիսի ժամանակ լրագրողների խնդրանքով այս չորսին առանձնացրել է ԼՂՀ Վերահսկիչ պալատի նախագահ Արթուր Մոսիյանը:

Այս գնահատականը բնականաբար բխում է պետական մարմիններում իրականացված վերահսկողության արդյունքներից: Նրա հավաստմամբ՝ նշված կառույցներում խախտումներ չեն արձանագրվել, այլ ընդամենը թերություններ: ՎՊ նախագահն ամենաօրինազանց կառույցների մասին նախընտրեց չխոսել՝ խորհուրդ տալով կարդալ Վերահսկիչ պալատի կայքում տեղադրված տեղեկությունները եւ անձամբ եզրակացություններ անել:

ԼՂՀ վերահսկիչ պալատի նախագահն այսօրվա ասուլիսի ժամանակ ամփոփել է 2010թ. գործունեության արդյունքները: Նրա տեղեկացմամբ՝ վերահսկողության արդյունքում հայտնաբերված խախտումներից վերականգնման ենթակա է շուրջ 151 մլն դրամ, որից հունվարի 1-ի դրությամբ մոտ 30 մլն դրամն արդեն վերադարձվել է պետբյուջե, իսկ մնացած մասը կվերադարձվի մինչեւ մարտ ամիսը: