ՀԱԿ-ը չի շտապում ամփոփել տարին

ՀԱԿ-ի համակարգող Լեւոն Զուրաբյանը այսօրվա ասուլիսում ասաց, որ նախատեսել են  մի  շարք  ցույցեր, որոնցից  առաջինը  տեղի կունենա դեկտեմբերի  10-ին: Զուրաբյանը  ներկայացրեց  նաեւ Աստանայում  արված  հայտարարությունների   վերաբերյալ  ՀԱԿ-ի  պաշտոնական   դիրքորոշումը: Ըստ  այդմ, հայկական  կողմը հերթական անգամ գործեց ի վնաս Հայաստանի. «Սերժ Սարգսյանի պաշտոնավարման ընթացքում  հայ դիվանագիտությունն արձանագրել է կործանարար նահանջներ»:

Բացի այդ, Զուրաբյանը հավաստիացրեց, որ Աստանայում ստորագրված համաձայնագրով, Հայաստանը համաձայնել է «օկուպացված տարածքներ» եզրույթի կիրառմանը: Զուրաբյանն էլ եզրակացնում է, թե դրանից Ալիեւի ախորժակն ակնհայտորեն ավելանալու է: «Իսկ ստեղծված իրավիճակը կարող է փոխել միայն Սերժ Սարգսյանի հրաժարականը»,- հավելեց  Զուրաբյանը:

Ի դեպ, Լեռնային Ղարաբաղի հանրապետության ճանաչման մասին Զուրաբյանը հայտնեց՝ ոչ թե ՀԱԿ-ի տեսակետը, այլ`իր: Ըստ որի, ԼՂՀ-ի ճանաչմամբ ՀՀ-ն դուրս է գալիս բանակցային գործընթացից: Ներկա իրավիճակում ՀՀ կողմից ԼՂՀ չճանաչելը Լեւոն Զուրաբյանը համարեց կառավարության դեռեւս միակ ճիշտ որոշումը: