Կապանի բազմամետաղային հանքում փորձաքննություն չի իրականացվել

ՀՀ Առողջապահության նախարարության պետական հիգիենիկ համաճարակային տեսչությունից ԵՐԿԻՐ-ը փորձեց ճշտել, թե ինչպես է արձագանքում վերոնշյալ գերատեսչությունը Կապանի Շահումյան եւ Բանավան թաղամասերի բազմամետաղային հանքի` բաց եղանակով շահագործման խնդրին: Տեսչության աշխատանքի հիգիենայի եւ ճառագայթային անվտանգության բաժնի պետ Սոս Հովհաննիսյանը մեզ պատասխանեց, որ հարցը քննության չի առնվել. «Առայժմ հանքի` բաց եղանակով շահագործման որեւէ պաշտոնական փաստաթուղթ կամ նախագիծ մենք չենք ստացել, հետեւաբար եւ փորձաքննություն չենք իրականացրել»,-պարզաբանեց Ս.Հովհաննիսյանը:

Նշենք, որ Կապանի բազմամետաղային հանքի սեփականատեր «Դինո Գոլդ Մայնինգ» ընկերությունը նախատեսում է մինչեւ տարեվերջ հանքավայրը բաց եղանակով շահագործել, ինչն, ըստ բնապահպանների, էկոլոգիական եւ առողջապահական լրջագույն խնդիրներ կառաջացնի Սյունիքում: