Թաքուն մրցակցություն` գործադիրի եւ օրենսդիրի միջեւ

ԱԺ ՀՅԴ խմբակցության քարտուղար Արտաշես Շահբազյանի կարծիքով, խորհրդարանում թաքուն մրցակցություն է գոյացել գործադիրի եւ օրենսդիրի միջեւ: Մեծամասնությունը արժանապատվությունից ցածր է համարում այդ մրցակցության մեջ պարտվել. «Մանավանդ կառավարությունը բավականին հիվանդագին է տանում, որ խորհրդարանը կարող է իրեն ինչ-ինչ փոփոխություններ թելադրել: Սակայն խնդիրն այդ ուժերի մրցակցությունը չէ, հարցն այն է, որ այդ պայքարում երկրորդական պլան է մղվում ժողովրդի ճակատագիրը, ժողովրդի վաղվա օրը: Օրինակ, մի ամբողջ տարի մի շարք օրենսդրական նախաձեռնություններ, որոնք չէին անցել խորհրդարանում, հանկարծ վերջում կառավարությունը որոշում է, որ` ոչ, տարին պետք է փակեն այդ նախագծերը անցկացրած: Սա ինչ է` պետական իշխանության ունեցած մտայնությո՞ւն, թե մեկ այլ բան: Բերել, պարտադրել` խուլ լինելով այն բոլոր մտահոգությունների եւ մտավախությունների հանդեպ, որ ներկահացվում են, քշի-քշի անելով բերել-ընդունել, մեզ համար անընդունելի է: Մենք հակված չենք գնալու ինքնանպատակ ընդդիմանալու ճանապարհով, մենք հակված ենք աշխատելու եւ բարեփոխումներ անելու փոխզիջումների ճանապարհով»,- ասել է Արտաշես Շահբազյանը:

Նրա դիտարկմամբ, իշխանությունը գնալով դառնում է ավելի անհանդուրժող ու կարծր. «Այսինքն` կարող են երկրի համար կարեւորագույն խնդիրներ չլուծվել միայն այն պատճառով, ինչ է թե իշխանությունն իր դիրքերը չզիջի»: