Վահան Հովհաննիսյանը վերջին հրաժարականների մասին

Անդրադառնալով վերջին պաշտոնանկություններին` ՀՅԴ խմբակցության ղեկավար Վահան Հովհաննիսյանն ասաց, որ երկուսն էլ իր համար շատ հասկանալի են: «Կառավարության կողմից արված նկատողությանը պետք է ուշադրությամբ վերաբերվել, և պատժել այն մարդկանց, ով որ խախտել է էթիկայի կանոնները»,- ասաց Վահան Հովհաննիսյանը, միաժամանակ շեշտելով, որ իր համար անհասկանալի է, թե ինչու մինչև հիմա չի հեռացվել այն անձը, ում պատճառով աշխատանքից ազատել էին արդարադատության նախարարին:

Քաղաքապետի հրաժարականի դեպքում էլ Վահան Հովհաննիսյանը հասկանում է, հրաժարականի պատճառը` «մարդը տեսնելով, որ անհարմար վիճակի մեջ է դրել իշխանություններին, հրաժարական է տվել», բայց չի հասկանում որոշ լրատվամիջոցների վերաբերմունքը դրանից հետո: «Գրում են` քաղաքապետը ինչ-որ տեղ ծառ է կտրել, անօրինական շինությունների թույլտվություն է տվել, բա ինչո՞ւ էիք մինչև այդ լռել, եթե նա այդքան վատն էր»,- հարցրեց նա: Վահան Հովհաննիսյանը նշեց, որ դժվար է նման հրաժարականներն անկեղծ մեկնաբանել, որովհետև անկեղծություն չկա կայացված որոշման մեջ: