Հրդեհի պատճառները դեռ պարզ չեն

Կորյունի 23 հասցեում բռնկված հրդեհից անցել է արդեն 12 օր, իսկ պատճառների մասին եզրակացություն դեռ չկա:

Պարզելու համար, թե ինչու մինչ օրս պատրաստ չէ եզրակացությունը, դիմեցինք ՀՀ արտակարգ իրավիճակների նախարարի մամուլի քարտուղար Նիկոլայ Գրիգորյանին: Նա ասաց, որ դեռևս փորձաքննություն է անցկացվում, եզրակացությունն ուշանում է, որովհետև կան տուժած բնակիչներ, ովքեր փակել են իրենց տան դռները, գնացել:

Հիշեցնենք, որ նոյեմբերի 24-ին, ժամը՝ 22.30-ի սահմաններում հրդեհ է բռնկվել Երևան քաղաքի Կորյունի 23 շենքի հարակից տարածքում գտնվող բնական գազի խողովակաշարում:

Դեպքի վայր են մեկնել Երևան քաղաքի հատուկ փրկարար ջոկատի երկու մարտական հաշվարկ: Հրդեհը մեկուսացվել է ժամը 00.23-ին, մարվել` 02.12-ին:

Այրվել են Սբ.Մեսրոպ Մաշտոցի պողոտայի 52 և 54 և Կորյունի փողոցի 21 և 21^ա շենքերի միջև գտնվող սեփական տների մի մասն ամբողջությամբ, մի մասը` մասամբ և դրանց տանիքները 1500 քմ մակերեսով:

Զոհեր և վիրավորներ չեն եղել, բայց բնակիչները մնացել են անօթևան: