Հայտնի են դարձել ՄՀՀ-ում հրդեհի բռնկման հնարավոր պատճառները

Նոյեմբերի 17-ին Մարզահամերգային համալիրում տեղի ունեցած հրդեհի առաջացման նախնական երկու վարկած կա` բաց կրակը և կարճ միացումը: Այս մասին yerkir.am- հետ զրույցում ասաց պետական հրդեհային և տեխնիկական անվտանգության տեսչության Երևանի հրդեհային և տեխնիկական անվտանգության տեսչության պետ Վլադիմիր Վահանյանը:

Նա նշեց, որ հրդեհի պատճառի, ինչպես նաև պարզել հասցված վնասի չափի մասին ավելի ստույգ հնարավոր կլինի ասել, փորձաքննության եզրակացությունը ստանալուց հետո:

Հիշեցնենք, որ հրդեհը բռնկվել էր Ուսանողների միջազգային օրվա առթիվ ՀՀԿ երիտթեւի կազմակերպած համերգից հետո: Արդյունքում` այրվել էր շոգեբաղնիքը՝ մոտ 25 քմ, ջերմահարվել էին հարակից սենյակները (25 քմ):

Համալիրի պատասխանատուների խոսքով` հրդեհը մոտ 200 մլն դրամի նյութական վնաս է առաջացրել, սակայն, մեր տեղեկություններով, հասցված վնասը չի գերազանցում անգամ 1 մլն դրամը: