ՆԱՏՕ-ն պատրաստ է հակամարտության ավարտից հետո անվտանգության երաշխիքներ տրամադրել Ուկրաինային

Միացյալ Նահանգները, Կանադան և ՆԱՏՕ-ի եվրոպական դաշնակիցները պատրաստ են անվտանգության երաշխիքներ տրամադրել Ուկրաինային, սակայն միայն Ռուսաստանի հետ խաղաղության համաձայնագրի կնքումից հետո։ «Արմենպրես»-ի հաղորդմամբ՝ այս մասին, ինչպես տեղեկացնում է Интерфакс-ը, սեպտեմբերի 24-ին հայտարարել է ՆԱՏՕ-ի գլխավոր քարտուղար Մարկ Ռյուտտեն։

Նա նշել է, որ Մեծ Բրիտանիայի և Ֆրանսիայի գլխավորած «ցանկացողների դաշինք»-ն աշխատում է անվտանգության երաշխիքների մեխանիզմի մշակման ուղղությամբ։

ՆԱՏՕ-ի գլխավոր քարտուղարը գտնում է, որ խաղաղության համաձայնագրի կամ երկարաժամկետ հրադադարի հաստատումից հետո անհրաժեշտ է կանխել նոր ռազմական գործողությունների բռնկմանը հանգեցնող իրավիճակի կրկնությունը։

Ավելի վաղ «ցանկացողների դաշինք»-ի երկրները և ԱՄՆ-ը համաձայնեցրել էին ապագա երաշխիքների համակարգի հիմնական տարրերը։ Դրանք ներառում են հրադադարի մշտադիտարկման մեխանիզմը՝ ԱՄՆ-ի գլխավորությամբ, ինչպես նաև ուկրաինական բանակին հետագա աջակցության ցուցաբերումը, բազմազգ ուժերի տեղակայման հնարավորությունը և ապագայում ռազմական գործողությունների բռնկման դեպքում Ուկրաինային օգնություն ցուցաբերելու պարտավորությունները։