Փաշինյանի հաղթանակը կարող է հանգեցնել ՀՀ-ի հետագա հեռացմանը ՌԴ-ից և վտանգել Գյումրիում ռուսական ռազմաբազայի ներկայությունը․ Զատուլին

Պետդումայի պատգամավոր Կոնստանտին Զատուլինը կասկածներ է հայտնել ՀՀ-ում ընտրությունների արդարության և օրինականության վերաբերյալ՝ նշելով, որ ընտրական գործընթացն ուղեկցվել է վարչական ճնշումներով և թեկնածուների ձերբակալություններով։ Նրա խոսքով՝ իշխող կուսակցության հաղթանակը կարող է հանգեցնել Երևանի հետագա հեռացմանը Ռուսաստանից և վտանգել Գյումրիում ռուսական ռազմաբազայի ներկայությունը։

Զատուլինի կարծիքով՝ եթե Փաշինյանին հաջողվի պահպանել իշխանությունը, Հայաստանը կշարունակի Արևմուտքի հետ մերձեցման քաղաքականությունը, ինչը կարող է հանգեցնել Ռուսաստանի հետ հարաբերությունների վերանայման և նույնիսկ ռուսական ռազմաբազայի դուրսբերման հարցի բարձրացման։ Նա նաև նշել է, որ հայկական իշխանությունները փորձում են հավասարակշռել Եվրասիական տնտեսական միությունում ինտեգրումն ու եվրոպական կապերի զարգացումը՝ միաժամանակ անտեսելով Հավաքական անվտանգության պայմանագրի կազմակերպության շրջանակում ստանձնած պարտավորությունները։

Ռուս քաղաքական գործիչը նշել է, որ Մոսկվան նախապես զգուշացրել էր Երևանին ՆԱՏՕ-ի և Եվրամիության հետ մերձեցման հնարավոր վտանգների մասին՝ խոսելով այդ ինտեգրացիոն գործընթացների ռազմական և տնտեսական ռիսկերի մասին։