ՌԴ-ում ՀՀ-ի հետ լարված հարաբերությունների ֆոնին՝ վերսկսվել է «Ջերմուկի» դեմ քրգործի հետաքննությունը

Ռուսաստանի Դաշնությունում վերսկսել են քրեական գործի հետաքննությունը, որը վերաբերվում է տղամարդու մահվան հանգամանքների ուսումնասիրությանն այն բանից հետո, երբ նա, ըստ ռուսական կողմի, մահացել է «Ջերմուկ» հանքային ջուր խմելուց հետո։

Ինչպես գրում է 24news-ը, ըստ ռուսաստանյան Lenta.ru-ի՝ այդ մասին ասել է Հյուսիսային Օսեթիայի Քննչական կոմիտեն։

Գործակալության տվյալներով՝ 2024 թվականի փետրվարի 11-ին մահացած տղամարդը խմել է «Ջերմուկ» հանքային ջուր, որը գնել էր Վլադիկավկազի մանրածախ առևտրի կետերից։ Դրանից հետո նա սկսել է իրեն շատ վատ զգալ, և նրա վիճակը վատացել է։ Նա հոսպիտալացվել է, սակայն բժիշկներին չի հաջողվել փրկել նրան՝ չնայած արագ բժշկական օգնությանը։ Փաստորեն, երկու տարի անց քրեական գործը վերաբացվել է «նոր ի հայտ եկած հանգամանքներին» հղում անելով։

Նկատենք, որ այս լուրի համատեքստում ռուսական տելեգրամ ալիքները սկսել են նշել, որ «Ջերմուկ» հանքային ջրերի գործարանի արտադրության շուրջ 60%-ն արտահանվում է Ռուսաստան՝ ակնարկելով, որ հայ-ռուսական հարաբերությունների լարվածության ֆոնին ներկրումը կարող է դադարեցվել այն պատճառով, որ «Ջերմուկի» սեփականատերերը հանդիսանում են վարչապետ Նիկոլ Փաշինյանի և իշխող ՔՊ-ի ակտիվ աջակիցներ։ Հիշեցնենք, որ «Ջերմուկը» պատկանում է գործարար Աշոտ Արսենյանին, որի որդին՝ Վահագն Արսենյանը, Վայոց Ձորի մարզպետն է։ Ինքը՝ գործարարը, նույնպես ՔՊ-ի աջակից է, չնայած ժամանակին աջակցել է Հայաստանի բոլոր իշխանություններին։ Մամուլում բազմիցս գրվել է այն կասկածելի գործարքների մասին, որի շնորհիվ Արսենյանների կառուցած  և Արշակունյաց պողոտայում գտնվող «Բյուրեղ» թաղամասում բնակարաններ են ստացել բազմաթիվ ՔՊ-ականներ։

Ապրիլի 1-ին Մոսկվայում տեղի ունեցած Փաշինյան-Պուտին հանդիպումից անմիջապես հետո ռուսական կողմն արգելեց ՌԴ ներմուծել Հայաստանից արտահանվող ծաղիկ, այնուհետև լուրեր ստացվեցին, որ արգելվել է նաև «Պռոշյան» գինու գործարանի արտադրանքի ներմուծումը։