Թրամփը դժգոհել է, որ որոշ երկրներ հրաժարվել են աջակցել ԱՄՆ-ին Իրանի դեմ պատերազմում

ԱՄՆ նախագահ Դոնալդ Թրամփը դժգոհություն է հայտնել մի շարք դաշնակիցներից Հորմուզի նեղուցով նավագնացության անվտանգությունն ապահովելու գործում օգնելուց հրաժարվելու համար։ «Արմենպրես»-ի փոխանցմամբ՝ այս մասին նա ասել է Սպիտակ տանը լրագրողների հետ զրույցում, որի տեսանյութը տարածել է LiveNOW from Fox-ը։

Թրամփի խոսքով՝ ԱՄՆ-ն Ճապոնիայում ունի 45 000 զինվոր, Հարավային Կորեայում՝ 45 000, ևս 45 000 կամ 50 000՝ Գերմանիայում։ Նա նշել է, որ ԱՄՆ-ն պաշտպանում է այս բոլոր երկրները, իսկ երբ նրանց խնդրել են ականազերծող նավեր տրամադրել, նրանք ցանկացել են չներգրավվել։

«Մենք տրիլիոնավոր և տրիլիոնավոր դոլար ենք ծախսել ՆԱՏՕ-ի վրա՝ այլ երկրների պաշտպանության համար, և ես միշտ ասել եմ, որ եթե գործը հասնի մեզ պաշտպանելուն, ապա նրանք չեն օգնի։ Նրանցից շատերը մեր կողքին չեն լինի։ Եվ մեր երկիրը պետք է սկսի ավելի խելացի կերպով մտածել», - ասել է նա։

Այս առումով ԱՄՆ նախագահն ընդգծել է, որ  «որոշ երկրներ» իրեն «խիստ հիասթափեցրել են»։ Նա չի նշել այդ պետությունները, բայց ակնարկել է, որ խոսքը ՆԱՏՕ-ի գծով դաշնակիցների մասին է։

Ի դեպ, ճապոնական NHK պարբերականը Պենտագոնին հարցում է արել Թրամփի նշած թվերի վերաբերյալ։ Պաշտոնյաներից մեկը հայտնել է, որ Ճապոնիայում տեղակայված է 50 000 ամերիկացի զինվոր, Հարավային Կորեայում՝ 28 500, իսկ Գերմանիայում՝ 35 000։