ՈՒԵՖԱ-ն ցավակցություն է հայտնել Նիկիտա Սիմոնյանի մահվան կապակցությամբ

Եվրոպական ֆուտբոլային ասոցիացիաների միությունը (ՈՒԵՖԱ) հայտնի խորհրդային ֆուտբոլիստ Նիկիտա Սիմոնյանի մահվան կապակցությամբ ցավակցություն է հայտնել սոցիալական ցանցերի իր էջում։

«Մենք մեր անկեղծ ցավակցությունն ենք հայտնում օլիմպիական ֆուտբոլի չեմպիոն և ականավոր գլխավոր մարզիչ Նիկիտա Սիմոնյանի մահվան կապակցությամբ, ով ապրեց մինչև 99 տարեկան հասակը»,-ասվում է ՈՒԵՖԱ-ի հայտարարության մեջ։

Սիմոնյանը մահացել է նոյեմբերի 23-ի երեկոյան։ Նա 99 տարեկան էր։ Ռուսաստանի ֆուտբոլի վետերանների միության ղեկավար Ալեքսանդր Միրզոյանի խոսքով՝ ֆուտբոլի լեգենդը հոսպիտալացվել է նոյեմբերի 20-ին՝ վատառողջության պատճառով, և այնտեղ մնացել է երեք օր։

2025 թվականի հոկտեմբերի 10-ին Ռուսաստանի նախագահ Վլադիմիր Պուտինը նախկին ֆուտբոլիստին շնորհել է Աշխատանքի հերոսի կոչում։

Իր կարիերայի ընթացքում Նիկիտա Սիմոնյանը «Սպարտակի» հետ չորս անգամ նվաճել է ԽՍՀՄ չեմպիոնի տիտղոսը՝ ակումբի կազմում խփելով ռեկորդային 160 գոլ։ Նա նաև դարձել է օլիմպիական չեմպիոն Խորհրդային հավաքականի հետ։ Սիմոնյանը պրոֆեսիոնալ ֆուտբոլից հեռացավ 1959 թվականին։