Ախալքալաքի Սակրեբուլոյի առաջին նիստում նախագահ է ընտրվել Ռուբեն Պալյանը

Այսօր՝ հոկտեմբերի 30-ին, Ախալքալաքում տեղի ունեցավ նորընտիր Սակրեբուլոյի (շրջանի ղեկավար մարմնի` ժողովի) առաջին նիստը։

Պատգամավորները ընտրեցին նախագահ, փոխնախագահներ, խմբակցությունների ղեկավարներ և մշտական ​​հանձնաժողովների ղեկավարներ։

Քվեարկությունից հետո Ռուբեն Պալյանը ընտրվեց Սակրեբուլոյի նախագահ։

Նիստին ներկա էին Ախալքալաքի մունիցիպալիտետի (քաղաքապետարանի) ղեկավար Մելքոն Մակարյանը, քաղաքապետարանի աշխատակազմը և շրջանային ընտրական հանձնաժողովի ներկայացուցիչները։

Ընտրական օրենսգրքի համաձայն, Սակրեբուլոյի առաջին նիստը բացեց թիվ 40 շրջանային ընտրական հանձնաժողովի նախագահ Հասմիկ Մարանգոզյանը։ Նիստն սկսվեց Վրաստանի հիմնի կատարմամբ։

Իր ելույթում Մարանգոզյանը շնորհավորեց նորընտիր քաղաքապետ Մելքոն Մակարյանին և պատգամավորներին՝ մաղթելով նրանց արդյունավետ աշխատանք, ապա նախագահությունը փոխանցեց խորհրդարանի ամենատարեց պատգամավոր Գայոզ Լոմսաձեին։

Պատգամավորները շնորհակալություն հայտնեցին Հասմիկ Մարանգոզյանին և ծաղիկներ նվիրեցին նրան։

Այնուհետև, որպես Սակրեբուլոյի նախագահ, Ռուբեն Պալյանն առաջադրեց Նաիրի Իրիցյանի թեկնածությունը առաջին փոխնախագահի պաշտոնում։ Առաջարկը ստացավ մեծամասնության աջակցությունը. 38 պատգամավորներից 37-ը քվեարկեցին կողմ։

Վոլոդյա Յայլոյանը և Արմեն Մարանգոզյանը առաջադրվեցին երկրորդ և երրորդ տեղակալների պաշտոնների համար, ովքեր ևս ընտրվեցին ժողովի կողմից։

Ախալքալաքի նորընտիր Սակրեբուլոյի անդրանիկ նիստին մասնակցում էին 38 պատգամավորներից 37-ը։ Նրանցից 15-ը ընտրվել էին համամասնական, 23-ը՝ մեծամասնական ընտրակարգով։

Նորընտիր պատգամավորներից 11-ը նոր էին, իսկ մնացածը՝ նախորդ գումարման ժողովի ներկայացուցիչներ։

Նիստի ընթացքում պատգամավոր Համլետ Մովսիսյանը հայտարարեց, որ ինքը՝ Հովիկ Մուրադյանի և Էդգար Լագզյանի հետ միասին, լքում է «Վրացական երազանք» կուսակցությունը և միանում «Ժողովրդի ուժ» կուսակցությանը՝ Ախալքալաքի քաղաքային խորհրդում ստեղծելով համանուն խմբակցություն։

Այսպիսով, Ախալքալաքի շրջանային ժողովում (Սակրեբուլոյում) ձևավորվեցին երկու խմբակցություններ՝

«Վրացական երազանք» (նախագահ՝ Գիա Մելիքիձե),

«Ժողովրդի ուժ» (նախագահ՝ Համլետ Մովսիսյան)։

Կազմավորվեցին նաև մշտական ​​հանձնաժողովներ, և հաստատվեցին դրանց նախագահները։

Համայնքային սեփականության, բնական պաշարների և գյուղատնտեսական հարցերի հանձնաժողովը նախագահելու է Գրիգոր Ղարագեբակյանը, մանդատների, ընթացակարգային, իրավական և էթիկայի հարցերի հանձնաժողովը` Սիփան Շիպակցյանը, ֆինանսական և բյուջետային հանձնաժողովը` Գայոզ Լոմսաձեն, տարածքային պլանավորման և ենթակառուցվածքների հանձնաժողովը` Գենադի Էլիզբարյանը, սոցիալական հարցերի, մշակույթի, կրթության, սպորտի և երիտասարդության հարցերի հանձնաժողովը` Սողոմոն Ասլանյանը։

Բոլոր ընտրությունները տեղի ունեցան գաղտնի քվեարկությամբ։

Աղբյուրը` Jnews.ge

Հիշեցնենք, որ Ռուբեն Պալյանը մասնագիտությամբ իրավաբան է, 2000 թ. ավարտել է Հայաստանի ոստիկանության բարձրագույն դպրոցը (ներկայումս` ոստիկանության ակադեմիա), այնուհետև ավարտել նաև Քութայիսի Զ. Ժվանիայի անվան պետական կառավարման դպրոցը։

Աշխատել է Ախալքալաքի շրջանի իրավապահ համակարգում, այնուհետև 2007 թ. նշանակվել Ախալքալաքի անձնագրային ծառայության պետ (ներկայումս Վրաստանի արդարադատության նախարարության պետական սպասարկումների գործակալության ծառայություն)։

Լուսանկարները` Ախալքալաքի քաղաքապետարանի պաշտոնական էջից։