Փոխարժեքներ
20 10 2025
|
||
---|---|---|
USD | ⚊ | $ 383.01 |
EUR | ⚊ | € 446.28 |
RUB | ⚊ | ₽ 4.7349 |
GBP | ⚊ | £ 513.5 |
GEL | ⚊ | ₾ 141.4 |
Ուրբաթ օրը հանրապետական մամուլը ցնցեց մի լուր՝ ձերբակալվել են Մանկավարժական համալսարանի ռեկտորը, պրոռեկտորը, դեկաններ, աշխատակիցներ: Ըստ այդ աղբյուրների` վերջիններս մեղադրվում են համալսարանի տարբեր աշխատակիցներից կազմված հանցավոր կազմակերպություն ստեղծելու և ղեկավարելու, առանձնապես խոշոր չափերով վատնում և խարդախություն կատարելու, ինչպես նաև կաշառք ստանալու մեջ:
Այս դեպքն առանձնանում է իր բացառիկությամբ: Առաջինը, սա աննախադեպ երևույթ է ՀՀ կրթության ոլորտում, երկրորդն էլ՝ ձերբակալվել են մի բուհի ղեկավարություն ու աշխատակիցներ, որը պատասխանատու է մեր երկրում սերունդների կրթության ու դաստիարակության հարցում:
Այս թեմայում, սակայն, հանրությունն ու ԶԼՄ-ները բաց թողեցին մի կարևոր հանգամանք՝ համալսարանի բարձրագույն կառավարման մարմնի՝ հոգաբարձուների խորհրդի դերակատարության մասին: Հոգաբարձուների խորհրդում ԿԳՄՍ նախարարության քվոտան օրենքով 25 տոկոս է, սակայն իրականում Ժաննա Անդրեասյանը խորհրդում ներկայացված է 9 հոգով կամ 45 տոկոսով: Վարչապետի կողմից ներկայացված 5 անդամներից 4-ը ԿԳՄՍ նախարարության և համակարգի աշխատողներ են: Նրանք են՝ Ժաննա Անդրեասյանը, իր տեղակալը՝ Արաքսյա Սվաջյանը (համակարգում է բարձրագույն կրթության ոլորտը), ԲԿԳ կոմիտեի ծրագրերի իրականացման վարչության պետ Լուսինե Գրիգորյանը և ՀՀ կրթության տեսչական մարմնի ղեկավար Վաղարշակ Մարտիկյանը:
Ի դեպ մանկավարժականի խորհրդի՝ ԿԳՄՍ նախարարության քվոտայով նշանակված անդամ Արմեն Ծատուրյանը վերջերս շատ պատահականությամբ դարձել է Վանաձորի պետական համալսարանի ռեկտոր: Մյուս անդամ Լիլիթ Մնացականյանն էլ հանդիսանում է «Հանրապետական մանկավարժահոգեբանական կենտրոն» պետական ոչ առևտրային կազմակերպության տնօրենը: Էլի պատահականությամբ Արաքսյա Սվաջյանը մինչև փոխնախարար նշանակվելը զբաղեցրել է այս կենտրոնի տնօրենի պաշտոնը:
ՀՊՄՀ կանոնադրությամբ հոգաբարձուների խորհրդի ի թիվ այլ հարցերի իրավասությունն է համալսարանի գործունեության, այդ թվում`ֆինասատնտեսական գործունեության վերահսկողությունը: Օրենքով՝ բուհի գործունեության համապատասխանությունը ՀՀ գործող օրենսդրությանը և իր կանոնադրությամբ նախատեսված նպատակներին վերահսկում է լիազորված մարմինը`ԿԳՄՍ նախարարությունը:
Այս ամենից հետո, հաշվի առնելով անմեղության կանխավարկածը, ԿԳՄՍ նախարարությունը` ի դեմս Ժաննա Անդրեասյանի, Արաքսյա Սվաջյանի, Լուսինե Գրիգորյանի, Վաղարշակ Մարտիկյանի ու նախարարության կողմից ներկայացված 5 անդամների, եթե չեն ստեղծել, մասնակցել կամ ղեկավարել հանցավոր կազմակերպությունը, ապա ցուցաբերել են անգործություն, որն էլ բերել է առկա իրավիճակին:
Ի դեպ, մանկավարժական համալսարանում ցանկացած աշխատակից տեղյակ է Ժաննայի, Արաքսյայի, Սրբուհու ու այլ տիկնանց մտերմության մասին:
Հ.գ. Եթե այս ամենը կատարվել է Ժաննայի ղեկավարած բուհում, ապա կարելի է պատկերացնել, թե ինչե՜ր են կատարվում Ժաննայի չղեկավարած բուհերում:
Վ․Ս․