Վենեսուելան փակում է իր դեսպանատները Նորվեգիայում և Ավստրալիայում

Վենեսուելան արտաքին քաղաքական ծառայության մասշտաբային վերակազմակերպման առաջին փուլի շրջանակներում փակում է իր դեսպանատները Նորվեգիայում և Ավստրալիայում: «Արմենպրես»-ի փոխանցմամբ՝ այս մասին հայտարարել է Վենեսուելայի կառավարությունը։

«Որպես ռեսուրսների ռազմավարական վերաբաշխման մաս որոշում է կայացվել Նորվեգիայի Թագավորությունում և Ավստրալիայում դեսպանատները փակելու մասին», - ասվում է հաղորդագրության մեջ, որը Վենեսուելայի արտգործնախարար Իվան Խիլը հրապարակել է իր Telegram ալիքում։

Հաղորդագրության համաձայն՝ Վենեսուելայի արտաքին ծառայության վերափոխման նպատակը պետական ​​ռեսուրսների օպտիմալացումն է և դիվանագիտական ​​ներկայության վերասահմանումը «Գլոբալ Հարավի հետ դաշինքներն ամրապնդելու, ժողովուրդների միջև համերաշխությունը խթանելու և փոխադարձ զարգացման նպատակով ռազմավարական բնագավառներում համագործակցելու համար»։

Ինչպես պարզաբանել է կառավարությունը, Վենեսուելայի քաղաքացիների սպասարկումը և երկկողմ կապերի զարգացումը Նորվեգիայում ու Ավստրալիայում հետագայում կապահովվեն դիվանագիտական ​​ներկայացուցչությունների միջոցով, որոնց մանրամասները կհայտարարվեն ավելի ուշ։

Միաժամանակ Վենեսուելայի կառավարությունը հայտարարել է, որ որոշել է նոր դեսպանատներ բացել Զիմբաբվեում և Բուրկինա Ֆասոյում։ Այդ ներկայացուցչությունները, նշվում է հայտարարության մեջ, հարթակ կդառնան գյուղատնտեսության, էներգետիկայի, կրթության, օգտակար հանածոների արդյունահանման և մյուս բնագավառներում համագործակցության համար։