ԿԳՄՍ նախարարության վարչության պետ Արմենուհի Պողոսյանը, բարոյական իրավունք չունի մտնելու Գորիսի պետական քոլեջ

Գորիսի պետական քոլեջի ֆեյսքության էջում տարածվել է հայտարարություն, որում մասնավորապես ասված է.

«ԿԳՄՍ նախարարության վարչության պետ Արմենուհի Պողոսյանը, այն էլ Արաքսիա Սվաջյանի կարգադրությամբ, բարոյական իրավունք չունի մտնելու Գորիսի պետական քոլեջ, քանի դեռ....

Հոկտեմբերի 7-ին Գորիսի պետական քոլեջ է այցելում ՀՀ ԿԳՄՍ նախարարության վարչության պետ Արմենուհի Պողոսյանը, ինչի մասին քոլեջի ղեկավարությունն իրազեկվել է հոկտեմբերի 6-ի օրվա երկրորդ կեսին:

Նպատակն է՝ ներկայացնել նոր ստեղծվող քոլեջի տնօրենի ժամանակավոր պաշտոնակատարին:

Այսօրվանից գործադուլի մեջ գտնվող Գորիսի պետական քոլեջի կոլեկտիվը հարկ է համարում հայտարարել՝ ԿԳՄՍ նախարարության վարչության պետ Արմենուհի Պողոսյանը Գորիսի պետական քոլեջ այցելելու բարոյական իրավունք չունի, քանի դեռ...

Ներկայումս Երեւան քաղաքի ընդհանուր իրավասության առաջին ատյանի քաղաքացիական դատարանում տեղի է ունենում Կարեն Լազարյանի հայցի քննությունը՝ ընդդեմ ՀՀ ԿԳՄՍ նախարարության:

Նախնական դատական նիստի ընթացքում արդեն իսկ ի հայտ են եկել փաստեր, որոնց համաձայն (առերեւույթ) ԿԳՄՍ փոխնախարար Արաքսիա Սվաջյանի գլխավորած հանձնաժողովը կատարել է հավաստագրման կարգի հետ կապ չունեցող գործողություններ, նաեւ իրավունք վերապահող փաստաթղթերի կեղծում, պաշտոնական լիազորությունների գերազանցում եւ ինքնիրավչություն:

Այդ հանձնաժողովի անդամներից մեկն էլ Արմենուհի Պողոսյանն է, ով, ըստ Հայցվորի միջնորդության, պետք է դատականչվի ու հարցաքննվի:

Միայն դատաքննության արդյունքում կպարզվի, թե ինչ դերակատարություն է ունեցել կամ չունեցել Արմենուհի Պողոսյանը դատարանում հնչած ապօրինությունների կազմակերպման գործում:

Մյուս կողմից՝ երկրի հակակոռուպցիոն մարմիններին ներկայացվող դիմումների քննարկման արդյունքում եւս պետք է ճշտվի նրա հնարավոր առնչությունները տեղի ունեցածի հետ:

Եվ քանի դեռ այդ հարցերը արդարադատության մարմինների կողմից չեն ճշտվել՝ Արմենուհի Պողոսյանը բարոյական իրավունք չունի մասնակցելու Գորիսի երկու քոլեջի միաձուլման գործընթացին:

Արմենուհի Պողոսյանի առաքելությունն առավել կասկածելի է դառնում այն հանգամանքով պայմանավորված, որ նրան Գորիս է գործուղել ԿԳՄՍ փոխնախարար Արաքսիա Սվաջյանը, ով գլխավորել է ապօրինի գործողություններ ծավալած հանձնաժողովի աշխատանքները:

Նա նույնպես, Հայցվորի միջնորդությամբ, պետք է դատականչվի եւ հարցաքննվի՝ Գորիսի պետական քոլեջի շուրջ տեղի ունեցող իրադարձությունների առնչությամբ:

Նրա անկողմնակալությունը եւ տեղի ունեցած ապօրինություններին անխառը լինելը պետք է հաստատվի կամ հերքվի երկրի հակակոռուպցիոն մարմինների կողմից:

Վերը շարադրված հանգամանքներով ենք մերժում եւ անցանկալի համարում նախարարության առաքյալի ներկայությունն այստեղ:

Իհարկե, Արմենուհի Պողոսյանը կարող է այցելել Գորիսի պետական քոլեջի շենք, բայց նրա հետ շփվելու կամ հաղորդակցվելու ցանկություն որեւէ մեկը չունի: Քոլեջի շենքում նրան կդիմավորեն դատարկ միջանցքներն ու սառը պատերը:

Իսկ մեր ներկայացուցիչները նրա հետ կհանդպեն դատարնի դահլիճում:

Բայց, եթե նախարար Ժաննա Անդրեասյանն իսկապես ուզում է նորմալ ձեւով կազմակերպել երկու քոլեջի միաձուլումը, ապա ինքը (ինչպես ներկայացված է գործադուլավորներիս պահանջի մեջ) անձամբ պետք է ներկայանա Գորիս, առերեսվի իրականության հետ, բացատրություններ տա մի շարք հարցերի վերաբերյալ, որոնք ի սկզբանե կապ չեն ունեցել Հայաստանի Հանրապետությունում գործող օրենքների հետ:

Համակարգող խումբ