Մարտունակ և ազգային գաղափարական հենքով բանակը փաշինյանական իշխանության համար լուրջ սպառնալիք է. Մհեր Մելքոնյան

ՀՅԴ Շիրակի Մարզային կոմիտեի ներկայացուցիչ, ԱԺ  «Հայաստան» խմբակցության պատգամավոր Մհեր Մելքոնյանը գրում է.

«Հայոց բանակի համակարգային թուլացումը վերջին տարիներին օրինաչափություն է դարձել։ Այդ գործընթացը, ցավոք, պատահական կամ անհաջող կադրային որոշումների հետևանք չէ։ Մենք կանգնած ենք մի իրողության առաջ, որտեղ մարտունակ և ազգային գաղափարական հենքով կառուցված բանակը դարձել է փաշինյանական իշխանության համար լուրջ սպառնալիք։

Ուժեղ, ինքնուրույն և պետական շահերով առաջնորդվող բանակը կարող է կասեցնել ոչ միայն արտաքին վտանգները, այլ նաև ներսից ծավալվող հակապետական գործընթացները։ Հետևաբար, այսօր բանակը պետք է դիտարկվի ոչ միայն որպես պաշտպանության համակարգ, այլ նաև որպես պետականության իրական հենասյունը։

Հայաստանի անվտանգ ապագան հնարավոր չէ պատկերացնել առանց ուժեղ բանակի։

Իսկ այդ բանակն անխուսափելիորեն պետք է ազատվի այս իշխանության վերահսկողությունից և արժեզրկող քաղաքականությունից:

Այս փուլում մարտունակ բանակ ունենալը պարզապես պաշտպանության հարց չէ։ Դա գոյության, ազգային ինքնության և պետականության պահպանման հարց է»։