Կովի տակը պառկես, ուսանողին անասնաբուժություն սովորեցնես, և քեզ կրճատե՞ն. ի՞նչ է կատարվում Ագրարայինում

Հայաստանի ագրարային համալսարանում տիրող հոռի բարքերի ու դրանց մասին բարձրաձայնող դասախոսների ազատման մասին շարունակում է ահազանգել ֆիզիկայի դասախոս Գվիդոն Մատինյանը: Նա մասնավորապես պատմել է.

«Համալսարանի դասախոս Վրեժ Խոցանյանը ինձ հետ միասին եկել էր հարցազրույցի, մենք միասին խոսել ենք բուհի պրոբլեմների մասին: Ուսանողներին պրակտիկ անասնաբուժություն սովորեցնող մարդ է: Հիմա նրան զրկել են դասերից: Պատճառաբանել են, որ պրակտիկ անասնաբուժության դասերը անցկացնելու են պրակտիկայի վայրում, զուգահեռ դասախոսին զրկել են դասաժամերից: Ես Խոցանյանին Վրեժին համարում եմ գանձ: Կովի տակ պառկես, ուսանողին անասնաբուժություն սովորեցնես, ով կարող է դա անել: Մարդուն կրճատել են խոսելու համար: Կրճատողն էլ անասնաբուժական ֆակուլտետի դեկան Արևիկ Աբովյանն է: Աբովյանը Բալահովիտի ուսումնափորձնական տնտեսության կովերի խոտանման ակտը ստորագրողներից մեկն է: Դրա համար էլ դեկան է: Իսկ կովերը վաճառել են կենդանի քաշի կիլոգրամը 450 դրամով: Իրականում այդ կովերը օրը 20 լիտր կաթ էին տալիս: Դա փաստել են Բալահովիտի տնտեսության աշխատողները»: