Իսրայելը հարվածել է եմենցի հութիների ռազմական կենտրոնին, գեներալ-մայոր ալ-Ղամարին ողջ է մնացել. ԶԼՄ-ներ

Եմենի զինված ուժերի գլխավոր շտաբի պետ, հութիների առաջնորդներից գեներալ-մայոր Մուհամեդ Աբդուլ Քարիմ ալ-Ղամարին ողջ է մնացել Սանայում բարձր մակարդակի ռազմական խորհրդակցության անցկացման կենտրոնին հասցված իսրայելական ավիահարվածից հետո, հաղորդում է Tasnim-ը՝ վկայակոչելով տարածաշրջանային լրատվամիջոցներին։

Լոնդոնյան արաբալեզու al-Araby al-Jadeed պարբերականը հայտնել է, որ շաբաթ ուշ երեկոյան Սանայի հարավ-արևմուտքում գտնվող Հադդա թաղամասում հզոր պայթյուն է որոտացել։ Պայթյունի պատճառը եղել է իսրայելական ավիացիայի հարձակումը, որի նպատակն էր բարձրաստիճան եմենցի զորահրամանատարների ոչնչացումը։

Հաղորդվում է, որ հարվածի պահին գեներալ-մայոր ալ-Ղամարին և մյուս բարձրաստիճան հրամանատարները քննարկում էին Գազայի հակամարտությանը տրվող ռազմավարական պատասխանը։

Անվտանգության ուժերը պայթյունից հետո արագ շրջափակել են տարածքը, իսկ դեպքի վայր շտապող շտապօգնության մեքենաներ են նկատվել։

Ալ-Ղամարիի վիճակի մասին Եմենի զինված ուժերից կամ «Անսար Ալլահ» շարժումից առայժմ պաշտոնական հայտարարություն չկա։

Նա համարվում է Իսրայելին Եմենի ռազմական դիմադրության առանցքային դեմքերից մեկը։