Զելենսկին՝ Պուտինի առաջարկի մասին. Ուկրաինան պատրաստ է, բայց կա մեկ պայման

Ուկրաինան պատրաստ է բանակցությունների համար հանդիպել Ռուսաստանի հետ։ Սակայն դրանից առաջ Մոսկվան պետք է մայիսի 12-ից հրադադար հաստատի, հայտարարել է Ուկրաինայի նախագահ Վլադիմիր Զելենսկին, հաղորդում է «РБК-Украина»-ն։

Զելենսկին «լավ նշան» է անվանել այն, որ ռուսաստանյան կողմը մտածում է պատերազմի ավարտի մասին։ Նա նշել է, որ ցանկացած պատերազմի իրական ավարտի ամենաառաջին քայլը հրադադարն է։

Ուկրաինայի նախագահը հայտարարել է, որ երկիրը պատրաստ է հանդիպումների, բայց դրանից առաջ պետք է դադարեցնել կրակը։

«Անգամ մեկ օր սպանությունները շարունակելու իմաստ չկա։ Ակնկալում ենք, որ Ռուսաստանը մայիսի 12-ից կհաստատի լիակատար, տևական և հուսալի հրադադարը, և Ուկրաինան պատրաստ է հանդիպելու»,- ասել է Զելենսկին։

Հիշեցնենք, որ մայիսի լուսյ 11-ի գիշերը ՌԴ նախագահ Վլադիմիր Պուտինը հանդես է եկել մամուլի համար հայտարարությամբ, որի ընթացքում առաջարկել է մայիսի 15-ին Ստամբուլում Ուկրաինայի հետ առանց նախապայմանների բանակցություններ սկսել։