Հյուրընկալել էինք կրթության ոլորտի ներկայացուցիչներին, լսել նրանց խնդիրները. ԱԺ պատգամավոր Արմինե Խերանյան

Քաղաքացիների հետ շաբաթօրյա պարբերական հանդիպումների շրջանակում այս անգամ հյուրընկալել էինք կրթության ոլորտի ներկայացուցիչների` լսելու նրանց խնդիրները, քննարկելու կրթությանն առնչվող մերօրյա հարցերը։ Այս մասին տեղեկացնում է ԱԺ «Հայաստան» խմբակցության պատգամավոր, ՀՅԴ անդամ Արմինե Խերանյանը` հայտնելով ՀՅԴ Շենգավիթի «Արամ Երկանյան» կոմիտեության գրասենյակում մանկավարժների հետ տեղի ունեցած հանդիպման մասին։

Պատգամավորի հերթական հանդիպման օրակարգում ընդգրկված էին Հայաստանի հանրակրթության ոլորտի հիմնախնդիրները։

Մանկավարժներն իրենց մտահոգությունն են հայտնել դպրոցներում և ուսումնական այլ հաստատություններում կազմակերպվող հայրենասիրական և Արցախյան թեմայով միջոցառումների սակավության վերաբերյալ։

Խոսվել է նաև ընդհանուր ներառման գործընթացում հանդիպող դժվարությունների մասին, իսկ ուսուցիչները առաջարկել են այդ շրջանակում կիրառվող այլընտրանքային ուղիներ։

Պատգամավորը նաև հավելել է, որ անմիջական և բովանդակալից զրույցն ավարտվել է կրկին հանդիպելու ցանկությամբ և «պահանջով»։

Հաջորդ հանդիպումը կկայանա մայիսի 17-ին երիտասարդների և ուսանողների հետ` լսելու նրանց հարցերը և քննարկելու ժամանակակաից մարտահրավերները։