Փարաքարում և Գյումրիում ընդդիմության գրանցած հաղթանակները պետք է վարակիչ լինեն ողջ ՀՀ-ի համար․ Գառնիկ Դանիելյան

ՀՅԴ Տավուշի Մարզային կոմիտեի ներկայացուցիչ, ՀՀ ԱԺ «Հայաստան» խմբակցության պատգամավոր Գառնիկ Դանիելյանը շնորհավորել է Վարդան Ղուկասյանին Գյումրիի քաղաքապետ ընտրվելու կապակցությամբ։

«Սիրելի՛ հայրենակիցներ, քիչ առաջ Վարդան Ղուկասյանը միաձայն ընտրվեց Գյումրիի քաղաքապետ։

Սա միասնական ընդդիմության հաղթանակն էր, ինչի կապակցությամբ շնորհավորում եմ բոլորիս։

Հարկ է նշել, որ սա տեղի ունեցավ, նախևառաջ, մեր գյումրեցի հայրենակիցների կամքի ու վճռականության շնորհիվ։ Գյումրեցին որոշեց, որ այլևս իշխող խմբակը վերարտադրվելու հնարավորություն չպիտի՛ ունենա։

Գյումրիի օրինակով պետք է արձանագրել նաև, որ ընդդիմադիր տարբեր ուժերի միավորումը անհնարին չէ․ մենք կարող ենք թողնել բոլոր տարակարծությունները և համախմբվել մեկ օրակարգի շուրջ։

Մաղթում եմ, որ Փարաքարում և Գյումրիում ընդդիմության գրանցած հաղթանակները վարակիչ լինեն ողջ ՀՀ-ի համար, և մեր ազգային միասնության շնորհիվ կարողանանք, ի վերջո, ազատվել երկիրը կործանման տանող իշխանություններից»։