Թուրքիայում բախումներ են եղել ոստիկանների և քաղաքացիների միջև

Տասնյակ հազարավոր ցուցարարներ մասնակցել են Թուրքիայում անցկացվող ցույցերին այն բանից հետո, երբ երկրի նախագահ Ռեջեփ Թայիփ Էրդողանի գլխավոր մրցակից Էքրեմ Իմամօղլուն պաշտոնապես կալանավորվել է և մեղադրվել կոռուպցիայի մեջ։ Իմամօղլուն հայտարարել է, որ իր դեմ ուղղված մեղադրանքները քաղաքական դրդապատճառներ ունեն։ 

Ի պատասխան նրա կալանավորման՝ մարտի 23-ի երեկոյան անկարգություններ են տեղի ունեցել․ ոստիկանները ցուցարարների վրա կրակել են ռետինե փամփուշտներով, հարվածել են մահակներով ու ոտքերով, բացի այդ, նրանց դեմ արցունքաբեր գազ ու ջրցան մեքենաներ են կիրառել:

Ցույցեր են անցկացվել Թուրքիայի 81 նահանգից առնվազն 55-ում։

Ընդդիմության տվյալներով միայն Ստամբուլում կիրակի փողոց է դուրս եկել մոտ մեկ միլիոն մարդ։ Սա այն դեպքում, որ իշխանությունը երկրում հավաքներ անցկացնելու արգելքը երկարարձգել էր մինչև մարտի 27-ը։

Երեկ նաև Հանրապետական-​​ժողովրդական կուսակցության փրայմերիզն էր, նախագահական ընտրություններում միասնական թեկնածու ընտրելու համար։ Կուսակցության ղեկավարը հայտնել է, որ Էքրեմ Իմամօղլուի օգտին քվեարել է ավելի քան 14 միլիոն մարդ։