ՆԱՏՕ-ի գլխավոր քարտուղարը չի բացառում Ռուսաստանի հետ բնականոն հարաբերությունների վերականգնման հնարավորությունը

ՆԱՏՕ-ի գլխավոր քարտուղար Մարկ Ռյուտեն հայտարարել է, որ Ռուսաստանի հետ հարաբերությունները պետք է ի վերջո կարգավորվեն Ուկրաինայի պատերազմի ավարտից հետո:

«Նորմալ կլիներ, եթե պատերազմն ինչ-որ կերպ դադարեցվեր Եվրոպայի համար, քայլ առ քայլ, ինչպես նաև ԱՄՆ-ի համար, քայլ առ քայլ վերականգնել բնականոն հարաբերությունները Ռուսաստանի հետ»,- Bloomberg TV-ին տված հարցազրույցում նշել է Ռյուտեն։

«Բայց մենք դեռ բացարձակ պատրաստ չենք, պետք է շարունակենք ճնշում գործադրել նրանց վրա, երաշխավորելու համար, որ Ռուսաստանը բանակցություններին լրջորեն վերաբերվի»,- ըստ BBC-ի՝ հավելել է ՆԱՏՕ-ի գլխավոր քարտուղարը։

Ռյուտեն հինգշաբթի Սպիտակ տանը հանդիպել է ԱՄՆ նախագահ Դոնալդ Թրամփի հետ, որտեղ նրանք քննարկել են Ուկրաինայում Վաշինգտոնի միջնորդությամբ հնարավոր զինադադարը:

«Պետք է շարունակենք ճնշում գործադրել նրանց վրա, որպեսզի համոզվենք, որ նրանք պատրաստ են լրջորեն բանակցություններ վարել ամերիկյան վարչակազմի և, իհարկե, ուկրաինացիների հետ»,- շեշտել է Ռյուտեն բանակցությունների մասին՝ նկատի ունենալով ռուսական իշխանություններին։