Սիրիայի զինված ուժերը հետ են մղել զինյալների հարձակումը Համայի շրջանում

Սիրիայի զինված ուժերի զինվորականները հետ են մղել զինված գրոհայինների հարձակումը Արաբական Հանրապետության արևմուտքում գտնվող Համա քաղաքի շրջանում։ Այս մասին հայտնում է Sham FM ռադիոկայանը։

Ըստ տեղեկությունների՝ միջադեպը տեղի է ունեցել քաղաքից հյուսիս գտնվող Կամխանա բնակավայրի մոտակայքում, ահաբեկիչներին չի հաջողվել կառավարական ուժերին հետ մղել իրենց զբաղեցրած դիրքերից:

Համա նահանգի հյուսիսային և հյուսիսարևելյան հատվածներում զինվորականներին հաջողվել է խոցել գրոհայինների կողմից արձակված մի քանի անօդաչու թռչող սարքեր, իսկ Ալ-Ույուր գյուղի շրջանում շարունակվում են «կատաղի բախումները»։

Ավելի վաղ Al-Ikhbaria հեռուստաալիքը հայտնել էր, որ սիրիական բանակը վերահսկողության տակ է վերցրել Համա քաղաքի ծայրամասերը։ Կառավարական ուժերը ահաբեկիչներից հետ են գրավել նաեւ Համա նահանգի հյուսիս-արեւմուտքում գտնվող Տուբա գյուղը։

Հիշեցնենք՝ նոյեմբերի 27-ին «Ջեբհաթ ան Նուսրա»-ի զինյալները խախտել են հրադադարի մասին համաձայնագիրը և գրոհել Սիրիայի Հալեպ և Իդլիբ Նահանգների վրա: Սիրիական բանակին աջակցում են Ռուսաստանի օդատիեզերական ուժերը՝ հարվածներ հասցնելով ահաբեկիչների տեխնիկային, կառավարման կետերին, պահեստներին և հրետանային դիրքերին։ Նոյեմբերի 30-ին հայտնի դարձավ, որ թուրքամետ արմատական խմբավորումները գիշերվա ընթացքում գրեթե ամբողջությամբ գրավել են Սիրիայի Հալեպ քաղաքը, իսկ Հալեպի գլխավոր հյուպատոսությունն ու Հայկական մարդասիրական առաքելությունը տարհանվել են։