Սիրիական բանակը հայտնում է, որ ավելի քան 400 ահաբեկիչ է ոչնչացվել

Սիրիական բանակը, ՌԴ օդատիեզերական ուժերի աջակցությամբ, անցած մի քանի ժամվա ընթացքում ոչնչացրել է ավելի քան 400 ահաբեկիչ, այդ թվում՝ օտարերկրյա վարձկանների: Այս մասին հայտարարել է սիրիական բանակի գլխավոր հրամանատարությունը։

«Վերջին ժամերի ընթացքում մեր ուժերի և բարեկամ ռուսների համատեղ հասցրած ճշգրիտ հարվածների արդյունքում ոչնչացվել է ավելի քան 400 ահաբեկիչ, որոնց թվում՝ օտարերկրացիներ», - ասվում է հայտարարության մեջ:

Հիշեցնենք՝ նոյեմբերի 27-ին «Ջեբհաթ ան Նուսրա»-ի զինյալները խախտել են հրադադարի մասին համաձայնագիրը և գրոհել Սիրիայի Հալեպ և Իդլիբ Նահանգների վրա: Սիրիական բանակին աջակցում են Ռուսաստանի օդատիեզերական ուժերը՝ հարվածներ հասցնելով ահաբեկիչների տեխնիկային, կառավարման կետերին, պահեստներին և հրետանային դիրքերին։ Նոյեմբերի 30-ին հայտնի դարձավ, որ թուրքամետ արմատական խմբավորումները գիշերվա ընթացքում գրեթե ամբողջությամբ գրավել են Սիրիայի Հալեպ քաղաքը, իսկ Հալեպի գլխավոր հյուպատոսությունն ու Հայկական մարդասիրական առաքելությունը տարհանվել են։