Շատ շուտով պայքարն ակտիվ գործողությունների մեջ կմտնի. Բագրատ Սրբազան

«Տավուշը հանուն հայրենիքի» շարժման առաջնորդ Բագրատ արքեպիսկոպոս Գալստանյանը վստահեցնում է` պայքարի ընթացքը հասել է վերջնահանգրվանին:

«Մենք գտնվում ենք այդ փուլի մեջ ու, այո՛, ուզում եմ ասել` այն անպարտելիության միֆը, որ ստեղծել են այս իշխանությունները, պատրանք է, ժողովո՛ւրդ, սրանք բացարձակ անպարտելի չեն, իրենք գտնվում են երկու երևույթի պաշտամունքի մեջ` փողի ու իշխանության»,- ֆեյսբուքյան ուղիղ եթերում հայտարարեց Սրբազանը:

Նա ասաց, թե միասնական ջանքերով պետք է պատվով առաջ գնալ: Սրբազանի հավաստիացմամբ՝ պայքարը շատ շուտով ակտիվ գործողությունների փուլ կմտնի: 

«Մեզնից ակնկալում են, թե, ի վերջո, երբ է փողոցն ակտիվ գործողությունների մեջ մտնելու: Կմտնի, շատ շուտով, մենք ամբողջության մեջ բոլոր շերտերով մանրակրկիտ գործում ու աշխատում ենք դրա համար»,- ընդգծեց Սրբազանը: