Իրաքում սուգ են հայտարարել Իրանի նախագահի զոհվելու կապակցությամբ

Իրաքում մայիսի 21-ին սգո օր է հայտարարվել հարևան Իրանի նախագահ Էբրահիմ Ռեյիսիի՝ ավիավթարից զոհվելու կապակցությամբ։ Այս մասին հայտարարություն է տարածել Իրաքի վարչապետ Մոհամմեդ աս Սուդանիի աշխատակազմը։

«Այս դժվարին ժամանակներում, ի նշան աջակցության Իրանի ժողովրդին և իշխանություններին…. Իրաքի կառավարությունը երեքշաբթի օրը հայտարարում է համընդհանուր սգո օր, որի գործողությունը տարածվում է երկրի ամբողջ տարածքում», - ասված է աշխատակազմի հաղորդագրության մեջ, որը հրապարակվել է Telegram-ում:

Ավելի վաղ Ռեյիսիի զոհվելու կապակցությամբ սուգ հայտարարելու որոշման մասին հայտնել են Պակիստանը, Լիբանանը և Սիրիան։

Հիշեցնենք՝ Իրանի նախագահական ուղղաթիռը երեկ՝ մայիսի 19-ին, «կոշտ վայրէջք» է կատարել Իրանի Արևելյան Ադրբեջան նահանգում, ինչի հետևանքով ուղղաթիռի անձնակազմն ու բոլոր ուղևորները, այդ թվում երկրի նախագահ Էբրահիմ Ռեյիսին ու ԱԳ նախարար Հոսեյն Ամիր Աբդոլլահիանը զոհվել են։