Ըստ իշխանությունների՝ Արցախի արտադրանքն այլևս հայկական ծագման չէ

Yerkir.am-ի տեղեկություններով՝ ՀՀ Առևտրաարդյունաբերական պալատի Հավաստագրման բաժինն այլևս չի կարողանում տրամադրել փաստաթուղթ, համաձայն որի՝ Արցախում արտադրված, ինչպես նաև Արցախում գրանցված և ՀՀ-ում իրենց գործունեությունը շարունակող ընկերությունների ապրանքներն ունեն հայկական ծագում։  

Այս իրողությունից ելնելով՝ նշված արտադրանքն անգամ սուպերմարկետների  դարակներից են ստիպում հավաքել պետական պատկան մարմինները, որպեսզի սուպերմարկետներում չվաճառվի Արցախում և արցախյան ընկերությունների կողմից արտադրված ապրանք և ստիպում են վերջինիս ծագումնաբանությունը փոխել ՀՀ ծագման ապրանքի: Տեղեկացանք նաև, որ այդ փոփոխության իրականացման ընթացքում շատ կորուստներ են ունենում արցախցի արտադրողները, առ այսօր շատերը չեն կարողանում օգտվել հարկային համակարգից և այլն։ 

Բնականաբար, նշված ընկերությունները խնդիրներ են ունենում նաև արտահանման հետ կապված, քանի որ վերջիններս չեն ստանում արտահանման համար անհրաժեշտ հայկական ծագման սերտիֆիկատը:

Արցախի Հանրապետությունը վերջնականապես կործանել փորձող ՀՀ իշխանությունները, բնականաբար, ամեն ինչ անելու են, որպեսզի բոլոր տեղերից ջնջեն Արցախ անունն ու ժխտեն Արցախի հայկական լինելը: Սա ճիշտ այն է, ինչի մասին տասնամյակներ շարունակ երազել են Թուրքիան և Ադրբեջանը: