Արցախը Հայաստանից անջատ դիտարկելը վտանգավոր է և սխալ․ Արտակ Բեգլարյան

Արցախն ու Հայաստանի Հանրապետությունը միասնական չդիտարկելը սխալ է և վտանգավոր, լրագրողների հետ զրույցում հայտարարել է Արցախի պետնախարար Արտակ Բեգլարյանը։

Խնդրանքին՝ մեկնաբանել ՀՀ իշխանությունների հայտարարությունները, թե Հայաստանն այլևս ռեսուրս չունի պաշտպանելու Արցախը, Արտակ Բեգլարյանն արձագանքել է․

«Արցախն ու Հայաստանի Հանրապետությունը ամբողջական շահերի և արժեքների համախումբ են, և մեկ միասնական հայրենիքում ենք մենք գտնվում։ Մեր խնդիրները միասնական են, մեր լուծումները պետք է լինեն միասնական։

Արցախը Հայաստանի Հանրապետությունից անջատված դիտարկելը բավականին վտանգավոր է և սխալ է։ Համազգային ամբողջ ներուժը պետք է միավորենք, որպեսզի կարողանանք դժվարին մարտահրավերները հաղթահարել»։

Արցախի պետնախարարը հավելել է՝ մեզ սպասվող երկարատև և ոչ հեշտ պայքարում պետք է լինենք հետևողական, սկզբունքային, առաջնորդվենք ռազմավարական մտածելակերպով։