Դիվանագիտական սկանդալ Ռուսաստանի և Իսրայելի միջև. ռուս դեսպանը կանչվել է Իսրայելի ԱԳՆ՝ Հիտլերի և հրեաների մասին Լավրովի հայտարարություններից հետո

Իսրայելում ՌԴ դեսպան Անատոլի Վիկտորովը կանչվել է Իսրայելի ԱԳՆ՝ նախարարության գլխավոր տնօրենի տեղակալի հետ պարզաբանումների՝ ՌԴ ԱԳ նախարար Սերգեյ Լավրովի հարցազրույցից հետո։ Այս մասին հայտնում է Իսրայելի ԱԳՆ մամուլի ծառայությունը։

Ավելի վաղ Mediaset-ին տված հարցազրույցում Լավրովը չէր բացառել, որ նացիստական Գերմանիայի ղեկավար Ադոլֆ Հիտլերը կարող է հրեական ծագում ունենալ։ «Եթե ճիշտ եմ հիշում, վախենում եմ սխալվել, բայց, իմ կարծիքով, Հիտլերը նաև հրեական արյուն ուներ»,- ասել է նա։

ՌԴ նախարարի հայտարարությունն արվել էր` ի պատասխան Ուկրաինայի նախագահ Վլադիմիր Զելենսկիի հայտարարության, որը խոսել էր իր հրեական արմատների և Ուկրաինայի «ապաազգայնացման» գործողության «ձախողման» մասին։

«Արտաքին գործերի նախարար Լավրովի խոսքերը և՛ աններելի և զայրացուցիչ հայտարարություն են, և՛ սարսափելի պատմական սխալ։ Հրեաներն իրենց չեն սպանել Հոլոքոստի ժամանակ: Հրեաների նկատմամբ ռասիզմի ամենացածր մակարդակը հենց հրեաներին հակասեմիտիզմի մեջ մեղադրելն է»,- ասվում է Իսրայելի արտգործնախարար Յաիր Լապիդի հայտարարությունում: