Եվրոպական չորս ընկերություն արդեն ռուբլով է վճարել ռուսական գազի մատակարարումների դիմաց. Bloomberg

Չորս եվրոպական ընկերություն արդեն ռուբլով է վճարել ռուսական գազի մատակարարումների դիմաց, ինչպես պահանջում է Մոսկվան, գրում է Bloomberg-ը՝ վկայակոչելով ռուսական գազային հսկա «Գազպրոմ» ՓԲԸ-ին մոտ կանգնած աղբյուրը։

Աղբյուրի փոխանցմամբ՝ Լեհաստան եւ Բուլղարիա գազի մատակարարումների դադարեցումից հետո նոր անջատումներ դժվար թե տեղի ունենան մինչեւ մայիսի երկրորդ կեսը, երբ պետք է կատարվեն հաջորդ վճարումները։

Տասը եվրոպական ընկերություն արդեն հաշիվներ է բացել Գազպրոմբանկում, որոնք անհրաժեշտ են Ռուսաստանի վճարային պահանջները բավարարելու համար:

Լեհաստան եւ Բուլղարիա մատակարարումները դադարեցվեցին այն բանից հետո, երբ երկրները հրաժարվեցին «Գազպրոմ»-ի առաջարկած ռուբլով վճարումների մեխանիզմից, որը չի խախտում ԵՄ պատժամիջոցները, հայտնել է աղբյուրը։ Ռուսաստանը գազատարներով գազ է մատակարարում եվրոպական 23 երկրի։

Մոսկվան պահանջել է մատակարարումների դիմաց ռուբլով վճարել ապրիլի 1-ից սկսած։ Սակայն ԵՄ-ն անդամ երկրներին հայտարարել է, որ Կրեմլի առաջարկած մեխանիզմը, որը եվրոյի եւ ռուբլու հաշիվների բացում է պահանջում Գազպրոմբանկում, կխախտի պատժամիջոցները: