Ռուսական ներխուժումն Ուկրաինա չկանխատեսելու համար Ֆրանսիայի ռազմական հետախուզության պետն ազատվել է աշխատանքից

Ֆրանսիայի ռազմական հետախուզության ղեկավար, գեներալ Էրիկ Վիդոն պաշտոնանկ է արվել յոթ ամիս պաշտոնավարելուց հետո։ Այս մասին չորեքշաբթի հայտնել է L'Opinion թերթը։

«55-ամյա գեներալ Վիդոն հեռացվել է աշխատանքից ուկրաինական ճգնաժամի ժամանակ հետախուզական աշխատանքում թերացումների համար».,- հայտնում է ՏԱՍՍ-ը։

Ռազմական հետախուզությունն անմիջականորեն ենթարկվում է Ֆրանսիայի զինված ուժերի գլխավոր շտաբին։

Figaro-ն գրում է, որ գեներալ Վիդոյի շուրջ սկանդալը ծագել է մարտի սկզբին, երբ գլխավոր շտաբի պետ, գեներալ Թիերի Բյուրկարը խոստովանել է, որ ֆրանսիական հետախուզությունը, ի տարբերություն ԱՄՆ-ի և Բրիտանիայի իրենց գործընկերների, քիչ հավանական էր համարում Ռուսաստանի ներխուժումն Ուկրաինա։ «Ամերիկացիները համոզված էին, որ ռուսները հարձակվելու են, և նրանք ճիշտ էին։ Մեր ծառայություններն ավելի շուտ հավատում էին, որ Ուկրաինայի նվաճումը թանկ կարժենա Ռուսաստանի Դաշնության համար, և որ նրանք այլ տարբերակներ ունեն նախագահ Զելենսկիին «տապալելու» համար»,- այն ժամանակ ասել էր Բյուրկարը: