Ռուս զինվորականները ոչնչացրել են Ադրբեջանի, Ալբանիայի, Սլովենիայի հյուպատոսությունների շենքերը. Ուկրաինայի ԱԳՆ

Ուկրաինայի արտաքին գործերի նախարարությունը հայտարարություն է տարածել՝ դատապարտելով Ռուսաստանի Դաշնության զինված ուժերի կողմից Ուկրաինայում օտարերկրյա դիվանագիտական հաստատությունների՝ Ադրբեջանի, Ալբանիայի, Հունաստանի և Սլովենիայի շենքերի գնդակոծումը։

«Մարիուպոլում ռուսական բանակի հրթիռային և ռմբակոծությունների հետևանքով վնասվել են Հունաստանի գլխավոր հյուպատոսության և ԵԱՀԿ հատուկ դիտորդական առաքելության գրասենյակի շենքերը, ինչպես նաև Սլովենիայի, Ադրբեջանի, Ալբանիայի պատվո հյուպատոսությունների շենքերը՝ Խարկովում»,- ասվում է հայտարարության մեջ. հայտնում է УНИАН-ը։

Ուկրաինայի ԱԳՆ-ն ընդգծել է, որ Ռուսաստանի զինված հարձակումը դիվանագիտական ներկայացուցչությունների շենքերի վրա կոպտորեն խախտում է միջազգային մարդասիրական իրավունքը, դիվանագիտական և հյուպատոսական հարաբերությունների մասին Վիեննայի կոնվենցիաները։