Չինաստանը նույնպես դեմ է ՆԱՏՕ-ի ընդլայնմանը

Չինաստանը դեմ է ՆԱՏՕ-ի ընդլայնմանը և անօգուտ է համարում իբր գլոբալ անվտանգության ապահովմանն ուղղված համապատասխան ջանքերը. ասվում է ԵՄ-ում Չինաստանի ներկայացուցչության հայտարարության մեջ։

«ՆԱՏՕ-ի ընդլայնումը չի օգնի ապահովել աշխարհում անվտանգությունն ու կայունությունը»,- հայտարարության տեքստից մեջբերում է ՏԱՍՍ-ը։

Փաստաթղթում ասվում է, որ Դաշինքի նման փորձերը «միայն նպաստում են քաղաքական դաշինքների ձևավորմանը եւ ռազմական ոլորտում առճակատման առաջացմանը»։ «Մենք կոչ ենք անում ՆԱՏՕ-ին՝ հրաժարվել «սառը պատերազմի» մտածելակերպից և գաղափարախոսությունից, հարգանք ցուցաբերել այլ երկրների ինքնիշխանության, անվտանգության ու շահերի, նրանց քաղաքակրթությունների, պատմության և մշակույթների տարբերությունների նկատմամբ»,- ասվում է հայտարարության մեջ:

«ՆԱՏՕ-ն սառը պատերազմի արդյունք է,- ասվում է փաստաթղթում։- Չինական կողմը կարծում է, որ տարածաշրջանային անվտանգությունը չի կարող ապահովվել ռազմական դաշինքների բռնի ընդլայնմամբ»։

Հայտարարության համաձայն՝ Հյուսիսատլանտյան դաշինքը «պետք է ավելի շատ ջանքեր գործադրի միջպետական վստահությունն ամրապնդելու, տարածաշրջանային խաղաղությունն ու կայունությունը իսկապես պաշտպանելու համար»։