Ճապոնիան բողոքել է Կուրիլյան կղզիներում Ռուսաստանի զորավարժությունների կապակցությամբ

Ռուսաստանը նախազգուշացում է տարածել, որ փետրվարի 8-ից արձակումներ կիրականացվեն Կունաշիր կղզուց հարավ-արևելք ընկած տարածքում։ Այդ կապակցությամբ մենք դիվանագիտական խողովակներով բողոքել ենք Ռուսաստանին․ ասել է Ճապոնիայի նախարարների կաբինետի գլխավոր քարտուղար Հիրոկազու Մացունոն՝ հավելելով, որ երկրի կառավարությունը չի հանդուրժի Հարավային Կուրիլներում Ռուսաստանի ռազմական ներկայության ավելացումը։

Նշվում է, որ Ճապոնիայի առափնյա պահպանությունն արդեն զգուշացրել է քաղաքացիներին այդ տարածքում տեղաշարժվելու վտանգի մասին։

Ավելի քան 50 տարի Ռուսաստանը և Ճապոնիան երկխոսություն են վարում Երկրորդ համաշխարհային պատերազմի արդյունքներից հետո խաղաղության պայմանագրի շուրջ։ Հիմնական խոչընդոտը Կուրիլյան կղզիների կարգավիճակի հարցն է։ Ճապոնական կողմն իր տարածքն է համարում Իտուրուպը, Շիկոտանը, Կունաշիրը և Հաբոմայ կղզիների խումբը։ Մոսկվան այս հարցում հակառակ դիրքորոշում ունի։