Կորոնավիրուսի նոր շտամի տարածումը նվազեցնելու համար Հայաստանում մի շարք սահմանափակումներ են նախատեսվում. Ավանեսյան

Կորոնավիրուսի նոր՝ օմիկրոն շտամի տարածումը նվազեցնելու համար Հայաստանում մի շարք սահմանափակումներ են նախատեսվում: Այս մասին լրագրողների հետ զրույցում ասաց առողջապահության նախարար Անահիտ Ավանեսյանը:

Նրա խոսքով՝ այսօր նախատեսվում է միջգերատեսչական հանձնաժողովի նիստ անցկացնել, քննարկել բոլոր առաջարկները, եւ մինչեւ օրվա վերջը հստակ սահմանափակումների ցուցակը, հավանաբար, արդեն պատրաստ կլինի:

Մասնավորապես՝ նախատեսվում է որոշ սահմանափակումներ կիրառել որոշ երկրներից եկող քաղաքացիների համար՝ Հարավաֆրիկյան Հանրապետություն, Բոդսվանայի Հանրապետություն, Լեսոտոյի Թագավորություն, Նամիբիայի Հանրապետություն, Զիմբաբվեի Հանրապետություն, Մոզամբիկ, Մադագասկար, Տանզանիա:

Նախարարի խոսքով՝ կորոնավիրուսի նոր շտամի տարածումը, ինչպես հայտնի է, սկսվել է Հարավաֆրիկյան Հանրապետությունից: Շտամը 50 մուտացիա է կրում, որոնցից 30-ը վերաբերում են վիրուսի սփայք սպիտակուցին: Այժմ մանրակրկիտ ուսումնասիրություններ են անցկացվում թե՛ մի շարք երկրներում, թե՛ ԱՀԿ-ի կողմից՝ պարզելու համար, թե, բացի տարածման ակտիվությունից, ինչ այլ առանձնահատկություններ ունի նոր շտամը: