Թուրքիան մեղադրել է Ռուսաստանին Իդլիբի վրա օդային հարձակման և մի քանի խաղաղ բնակիչների զոհվելու մեջ

Ռուսական ավիացիան հինգշաբթի մի շարք հարվածներ է հասցրել Սիրիայի հյուսիս-արևմուտքում գտնվող Իդլիբի դեէսկալացիայի գոտուն. գրում է թուրքական պետական «Անադոլու»-ն:

Թուրքական պետական ԶԼՄ-ն նշում է, որ Իդլիբ քաղաքի մերձակայքում գտնվող թռչնաբուծական ֆերմաներից մեկի վրա ավիահարվածի հետևանքով զոհվել են հինգ խաղաղ բնակիչներ, այդ թվում՝ երեք երեխա, չորսը հոսպիտալացվել են:

Ըստ սիրիական զինյալների աղբյուրների՝ ավիահարվածը հասցվել է երեկ Սու-34 ինքնաթիռից։ Ընդհանուր առմամբ, երեք պայթյուն է եղել։

Ռուսական օդատիեզերական ուժերը հինգշաբթի առավոտյան հարձակվել են նաև Իդլիբի հյուսիսում գտնվող Մաարետ-Միսրին շրջանի վրա, որտեղ փախստականների ճամբարներ են գտնվում։