Պեսկովն անընդունելի է համարել Ղրիմում քվեարկության վերաբերյալ Թուրքիայի հայտարարությունը

ՌԴ նախագահի մամուլի քարտուղար Դմիտրի Պեսկովը մեկնաբանել է Ղրիմում Պետդումայի ընտրությունների արդյունքների անվավերության մասին թուրքական իշխանությունների հայտարարությունները: Նրա խոսքով՝ Կրեմլի համար անընդունելի է Թուրքիայի դիրքորոշումը:

«Մենք չենք ընդունում նման հայտարարությունները, մենք դրա մասին բացահայտ խոսում ենք մեր թուրք գործընկերների հետ: Ղրիմի թեման այն թեման է, որի շուրջ մեր դիրքորոշումները տրամագծորեն տարբերվում են: Մենք ափսոսում ենք Թուրքիայի այս դիրքորոշման համար»,- նշել էՊեսկովը:

Նա հույս է հայտնել, որ ժամանակի ընթացքում Անկարան քաղաքական կամք կցուցաբերի եւ կփոխի իր դիրքորոշումն այս հարցում՝ «տուրք տալով ճշմարտությանը և գործերի իրական վիճակին»:

Նախօրեին Թուրքիայի ԱԳՆ-ն հայտարարել էր, որ Ղրիմում ընտրությունները լեգիտիմ չեն: Գերատեսչության պաշտոնական հայտարարության մեջ ասվում է, որ Անկարան պաշտպանում է Ուկրաինայի տարածքային ամբողջականությունը և թերակղզու մուտքը Ռուսաստանի կազմի մեջ համարում է անօրինական: