Չինական բանակը մարտական վիճակի է բերվել տարածաշրջանում ամերիկյան նավերի տեղաշարժի պատճառով

Չինաստանի զինված ուժերի արևելյան հրամանատարությունը շաբաթ օրը հայտնել է, որ չինական զորքերը գտնվում են մարտական պատրաստության մեջ՝ Թայվանի նեղուցում ամերիկյան ռազմանավի անցումը որակելով «անհանգստացնող»:

Ինչպես հայտնում է CGTN կայքը, Արևելյան Չինաստանի հրամանատարի խոսնակը հայտնել է, որ չինացի զինվորականները ուրբաթ հետևել են Թայվանի նեղուցում USS Barry ռազմանավի տեղաշարժին:

«Միացյալ Նահանգները բազմիցս իրականացրել է նման սադրիչ գործողություններ: Բանակը վճռականորեն պաշտպանում է երկրի ինքնիշխանությունն ու անվտանգությունը, ինչպես նաև տարածաշրջանում խաղաղությունն ու կայունությունը»,- ասել է Շի Յին:

Նրա խոսքով՝ չինական բանակը մարտական վարժություններ է անցկացրել ծովում և օդային տարածքում՝ Թայվան կղզու հարավարևմտյան շրջանում՝ փորձելով բարելավել զինված ուժերի մարտունակությունը:

«Նման զորավարժությունները պարբերաբար անցկացվում են՝ հիմնվելով Թայվանի նեղուցում անվտանգության պահպանման անհրաժեշտության և Չինաստանի ինքնիշխանության վրա»,- ասել է Շի Յին:

ԱՄՆ բանակի միացյալ շտաբի պետի տեղակալն ավելի վաղ հայտարարել էր, որ Չինաստանն ԱՄՆ-ի համար ամենավտանգավոր սպառնալիքն է: «Մեր ռազմական ռազմավարությունը պետք է արագ զարգանա՝ չինական սպառնալիքին դիմակայելու համար»,- ասել էր Ջոն Հեյթոնը: