Ֆրանսիան Հունաստանին ևս 6 Rafale կործանիչ է վաճառել

Կիրակի օրը Ֆրանսիան վեց Rafale կործանիչ է վաճառել Հունաստանի ռազմաօդային ուժերին՝ «հարևան Թուրքիայի հետ տարաձայնությունների ֆոնին»: Այս մասին Հունաստանը նախ հայտարարել էր շաբաթ օրը, իսկ հետո՝ կիրակի օրը, Twitter-ում տեղեկությունը հաստատել էր Ֆրանսիայի պաշտպանության նախարար Ֆլորենս Պարլին:

«Հիանալի նորություն. Հունաստանը նոր հայտարարել է վեց Rafale ձեռք բերելու մտադրության մասին: Մենք միասին աշխատում ենք իրական եվրոպական ինքնավարություն ստեղծելու ուղղությամբ»,- մեջբերում է նրան Ahval-ը:

Հաշվի առնելով վերջին գնումը՝ Հունաստանի սպառազինության մեջ առկա Dassault Rafael-ի թիվը հասել է 24-ի: Հունաստանի վարչապետ Կիրիակոս Միցոտակիսը հայտարարել էր, որ Ֆրանսիայի հետ ձեռք է բերվել պայմանավորվածություն 18 ինքնաթիռների նախնական գնման մասին՝ հավելելով, որ որոշում է կայացվել հետագայում  ևս վեց ինքնաթիռ գնելու վերաբերյալ:

Նշենք, որ Միջերկրականում Թուրքիայի հետ լարվածության բռնկումից հետո Հունաստանը սկսել է մեծ քանակության սպառազինություն գնել Արևմուտքից։