Մեր գերիները երկու ամիս կսպասե՞ն. Արեգնազ Մանուկյանի հարցը՝ Հայաստանի և Արցախի ՄԻ պաշտպաններին (տեսանյութ)

Հայաստանի մարդու իրավունքների պաշտպան Արման Թաթոյանը չի պատասխանի հարցին, ինչպես վարչապետ Նիկոլ Փաշինյանն էր ասում՝ «գերիները մեկ-երկու ամիս կարո՞ղ են սպասել»։

«Ես չեմ կարող պատասխանել, քանի որ դա ամբողջությամբ կքաղաքականացնի իմ պատասխանը»,- ի պատասխան ԱԺ «Հայաստան» խմբակցության պատգամավոր Արեգնազ Մանուկյանի հարցին՝ ասաց Թաթոյանը։

Նա, սակայն, նշեց, որ, հայ գերիներին վերադարձնելով, գործը չպետք է համարել ավարտված։

«Ի՞նչ է, խոշտանգումների համար Ադրբեջանը պետք է մնա անպատի՞ժ, իհարկե՝ ոչ, այստեղ երկու շատ մեծ բաղադրիչ կա՝ վերադարձ, հետո պատասխանատվության մեխանիզմներ ստեղծելու ուղղությամբ միջոցներ ձեռնարկել»,- ասաց Թաթոյանը։

Արցախի Հանրապետության մարդու իրավունքների պաշտպան Գեղամ Ստեփանյանն էլ ասաց, որ գերիները պետք է օր առաջ վերադարձվեն։

«Պետք է արվի առավելագույնը՝ Ադրբեջանից մեր հայրենակիցներին հանելու համար»,- ասաց նա։