Թուրքական և սիրիական հետախուզության ղեկավարները կհանդիպեն Բաղդադում

Թուրքիայի ազգային հետախուզական կազմակերպության (MİT) ղեկավար Հաքան Ֆիդանն ու Սիրիայի ազգային անվտանգության ծառայության ղեկավար Ալի Մամլուքը կհանդիպեն Բաղդադում. հաղորդում է Türkiye-ն:

Թուրքական թերթը նշում է, որ հանդիպման մասին նախ տեղեկացրել են ուժային կառույցներին մոտ կանգնած իրաքյան լրատվամիջոցները, սակայն ավելի ուշ թերթը ստացել է լիազորված պաշտոնյաների հաստատումը:

«Հանդիպումը կարող է լինել նոր գործընթացի սկիզբ: Գործընթացը, որն իրականացվում էր միջնորդ երկրների միջոցով, ինչպիսիք են Ռուսաստանը և Իրանը, իմաստ չուներ: Հաքան Ֆիդանի մասնակցությունը անպայման կակտիվացնի դիվանագիտության և քաղաքականության ուղիները և կազդարարի նոր շրջանի սկիզբը»,- ասել է Թուրքիայի գլխավոր շտաբի հետախուզության վարչության նախկին ղեկավար Իսմայիլ Հաքի Փեքինը:

Նա հավելել է, որ հանդիպման ընթացքում կքննարկվեն միգրացիայի և PKK-ի խնդիրները: